Inteligjenca amerikane: Rusia mund të inskenojë video për të krijuar pretekst për luftën në Ukrainë!

Zyrtarët e inteligjencës amerikane besojnë se Rusia ka krijuar një plan për të sajuar një pretekst për një pushtim të Ukrainës, potencialisht duke prodhuar video propagandistike që tregojnë një sulm të organizuar, tha zëdhënësi i Pentagonit, John Kirby.

Ai tha gjithashtu se Rusia po formulon disa opsione për t’i dhënë asaj një justifikim për një pushtim të Ukrainës. Sipas tij Rusia mund të prodhojë një video të fabrikuar që tregon pasojat grafike të një shpërthimi, duke përfshirë pajisjet që duket se i përkasin Ukrainës ose vendeve aleate.

Videoja do të “përfshinte kufoma dhe aktorë vajtues dhe imazhe të vendeve të shkatërruara”.

Rusia ka akuzuar Shtetet e Bashkuara për shtim të tensioneve dhe injorimin e thirrjeve të Moskës për të lehtësuar një bllokim mbi Ukrainën, një ditë pasi Uashingtoni njoftoi se do të dërgonte gati 3 mijë trupa shtesë në Poloni dhe Rumani.

Zëdhënësi i Pentagonit tha se çdo plan i tillë për videon e supozuar propagandistike do të miratohej “në nivelet më të larta të qeverisë ruse”. Rusia ka mohuar planet për një pushtim, por ka grumbulluar mijëra trupa në kufirin e saj me Ukrainën.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.