Interes i lartë për brezin 800 Mhz – AKEP: Operatorët do të vazhdojnë të investojnë
Autoriteti i Komunikimeve Elektronike dhe Postare pret interes të lartë nga investitorët për tenderin e frekuencave në brezin 800 Mhz. Drejtori i Rregullimit Ekonomik, Pajtim Melani, thotë se përdorimi i këtij brezi do të sjellë një ndikim të rëndësishëm në avancimin teknologjik, por edhe në zhvillimin ekonomik të vendit.
Sipas tij, pavarësisht se operatorët celularë në Shqipëri dhe jo vetëm në vitet e fundit kanë pësuar rënie të të ardhurave, interesi për të investuar ngelet i lartë. Ofertat për brezin 800 Mhz do të hapen më datë 3 dhjetor dhe AKEP ka përcaktuar se vlera minimale e ofertave për secilin prej tre autorizimeve të parashikuara duhet të jetë 7.44 milionë euro.
Këtë muaj, AKEP vendosi në rregullim të pjesshëm tarifat hyrëse të terminimit ndërkombëtar. Sipas zotit Melani, kjo masë u ndërmor në mënyrë që operatorët më të mëdhenj të mos përdorin të ardhurat e terminimit ndërkombëtar për subvencionimin e shërbimeve me pakicë dhe do të ketë një efekt në garantimin e konkurrencës së ndershme mes operatorëve.
AKEP ka miratuar edhe tarifat e reja me shumicë të operatorëve celularë. Që nga 1 dhjetori, kjo tarifë do të ulet në 1.22 lekë për minutë, nga 1.48 lekë që është aktualisht. Në 1 dhjetor 2019, tarifat do të ulen sërish në 1.11 lekë për minutë. Ulja e tarifave me shumicë krijon hapësira për më shumë konkurrencë në tarifat me pakicë mes operatorëve.
Erusin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.