Interes për sektorin e pastrimit – Një kompani italiane blen për 1.3 mln euro, 40% të një kompanie shqiptare
Kompania italiane “Servizi Italia”, një kompani e kuotuar në bursën e Milanos, dhe që zotëron 40% të aksioneve të kompanisë “Saniservice”, që ka koncesionin e sterilizimit të pajisjeve kirurgjikale në vendin tonë, ka njoftuar së fundmi blerjen e 40% të aksioneve të një kompanie shqiptare, “Sanitary Cleaning”. Për të marrë 40% të aksioneve, kompania italiane ka paguar plot 1.3 milionë euro.
Kompania në fjalë është e specializuar në ofrimin e shërbimeve të lavanderisë dhe pastrimit për spitalet dhe hotelet në vendin tonë. Më 16 Shkurt të vitit 2017 ndërkohë, siç rezulton nga dokumentet e Qendrës Kombëtare të Biznesit, kompania ka shtuar si objekt të aktivitetit të saj edhe evadimin e mbetjeve urbane, që duket se është një sektor me potencial të madh rritje në vendin tonë, duke pasur parasysh këtu edhe disa ndryshime ligjore në sektor.
Në njoftimin për media të kryerjes së transaksionit, kompania italiane sqaron se, zgjerimi në Shqipëri vjen si pasojë e perspektivës së rritjes që ka ky sektor në vendin tonë si në terma të ardhurash, ashtu edhe në terma fitimesh. Kompania në fjalë ndërkohë, është themeluar në vitin 2014 dhe pritet që të gjenerojë të ardhura në 1.5 milionë euro përgjatë vitit aktual.
Të ardhurat për 2018 priten më të larta se 2017 për shkak të kontratave të reja që ka marrë kompania, thotë vetë “Servizi Italia” në deklaratën për shtyp.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.