Interesat e borxhit publik, peshë të rëndë në buxhet – Gjatë 6 muajve të parë u paguan 350 milionë dollarë për shërbimin e huave shtetërore
Edhe për vitin 2021, shërbimi i borxhit publik do të peshojë rëndë në buxhetin e shtetit. Vetëm gjatë 6 muajve të parë të vitit nga buxheti i shtetit janë paguar rreth 350 milionë dollarë për shërbimin e borxhit publik, të jashtëm e të brendshëm. Trend i ngjashëm me kostot e shërbimit të borxhit përgjatë vitit 2020, kur për këtë qëllim u paguan nga buxheti i shtetit, plot 96 miliardë lekë, afërisht 900 milionë dollarë, ose sa 6.1% e Produktit të Brendshëm Bruto.
Të dhënat vijnë përmes raportimit më të fundit të Ministrisë së Financave mbi ecurinë e borxhit publik. Ndërsa jemi ende në gjysmën e parë të vitit, janë paguar nga buxheti i shtetit vetëm për shërbimin e borxhit shtetëror plot 35.5 miliardë lekë, shifër kjo e barasvlershme me 2.1% të Produktit të Brendshëm Bruto. Vetëm intersat kanë kapur vlerën e 18 miliardë lekëve, afërisht 180 milionë dollarë. Ndërkohë që intersat e borxhit të jashtëm janë shumë më të larta se ato të brendshmiot: Afërisht 110 milionë dollarë janë paguar gjatë gjashtë muajve të parë të vitit për ineteresat e borxhit të jashtëm, rreth 65 milionë dollarë për borxhin e brendshëm. Totali i principalit për gjashtë muajt e parë të vitit arrin në 170 milionë dollarë.
Ndërsa shënoi një trajektore rënëse nga viti 2015, kur për t’i shëbryer borxhit publik qeveria pagoi rnga buxheti rreth 1 miliardë dollarë, shifrat e borxhit kërcyen në vitin 2020 për shkak të tërmetit të një viti më parë në rreth 960 milionë dollarë. Shifra që pritet të mbeten në nivele të njëjta për vitin 2021, duke parë ecurinë e deritanishme, por edhe huatë apo garancitë sovrane të miratuara nga shteti për shkak të Pandemisë Covid 19.
Stoku i borxhit publik të Shqipërisë është rritur lehtë gjatë tremujorit të dytë të vitit 2021, krahasuar me tremujorin paraardhës. Të dhënat më të fundit të publikuara nga ministria e Financave dhe Ekonomisë tregojnë se borxhi publik në periudhën prill-qershor ishte 1,273 trilionë lekë, ose sa 75,67% e Prodhimit të Brendshëm Bruto. Në projektdokumentin e programit buxhetor afatmesëm 2022-2024, ministria e Financave dhe Ekonomisë parashikon që deri në vitin 2024 niveli i borxhit publik të ulet në 70,8% të PBB, kundrejt 80,4% që parashikohet të shkojë në fund të vitit 2021.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.