Interesat me dy nivele të BQE/ Përfituesit më të mëdhenj janë bankat gjermane, kryesisht Deutsche Bank

Deustche Bank do të jetë përfituesi më i madh deri më tani nga norma e interesit të depozitave me nivele e Bankës Qendrore Europiane, sipas analistëve  të JPMorgan.  Huadhënësi më i madh në Gjermani pritet të kursejë rreth 200 milionë euro në pagesa vjetore të interesit, falë rregullit të ri që përjashton një pjesë të madhe të parasë që mban te Banka Qendrore nga norma negative e interesit.

Kjo është ekuivalente me 10% të fitimit përpara taksave që analistët e bankës presin për vitin 2020.

Bankat e tjera të Bashkimit Europian pritet të kursejnë në mesatare 2.5% të fitimit përpara taksave.  BQE uli normën e interesit për depozitat me 10 pikë bazë në -0.5% në takimin e kësaj jave, ndërkohë që po përballet me vështirësi në arritjen e objektivit për inflacionit. Bankat  janë ankuar prej kohësh se normat negative të interesit po ndikojnë te përfitueshmëria.

Kreu ekzekutiv i Deutsche Bank, Christian Sewing tha gjatë javës së kaluar se normat negative të interesit do të “shkatërrojnë sistemin financiar” në afat-gjatë. Përfituesi i dytë më i madh nga sistemi me nivele i interesave për depozitat është Commerzbank, që pritet të kursejë rreth 100 milionë dollarë nga pagesat e interesit, apo rreth 6% të fitimit të projektuar për 2020.

Për të gjithë sistemin bankar, lehtësimi në pagesat e interesit te Banka Qendrore Europiane arrin në 1.7 miliardë euro.

Dy bankat gjermane po përfitojnë më shumë për shkak se kanë një nivel relativisht të lartë të depozitave te BQE, ndaj të cilave aplikohet rregulli i ri.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.