Interneti në shtëpi – Abonentët arrijnë në afro 300 mijë
Numri i abonentëve të internetit me linja fikse njohu një rritje të konsiderueshme gjatë vitit të kaluar. Sipas të dhënave nga Autoriteti i Komunikimeve Elektronike dhe Postare, në fund të vitit 2017 numri i pajtimtarëve të internetit arrit në 294 mijë, në rritje me 10.4% krahasuar me të njëjtën periudhë të një viti më parë.
Gjatë vitit 2017, shërbimit të internetit i janë shtuar rreth 28 mijë abonentë të rinj.
Rritja është akoma më e lartë në segmentin e përdoruesve me shërbime të integruara, ku përfshihen interneti, telefonia dhe televizioni. Numri i abonentëve që marrin të paktën dy shërbime njëkohësisht ka arritur në 198 mijë, në rritje vjetore me 6%. Përfshirja e platformave televizive në paketa i ka dhënë një shtysë edhe më të fortë zgjerimit të shërbimeve të integruara të komunikimit.
Sidoqoftë, Shqipëria ka ende një depërtim të ulët të linjave fikse, sidomos jashtë qendrave të mëdha urbane, ngelet një pengesë për t’i dhënë të gjithë popullsisë akses në internet.
Përdorimi i internetit me brez të gjerë po rritet me ritme edhe më të larta nga rrjetet celulare. Sipas AKEP, janë pak më shumë se 2 milionë shqiptarë me akses në internet 3G dhe 4G nga aparatet celularë.
Numri i përdoruesve të internetit nga rrjetet celulare pësoi një rënie të lehtë gjatë tremujorit të fundit 2017, por, krahasuar me fillimin e vitit numri i përdoruesve u rrit ndjeshëm, me mbi 20%. Shërbimi i internetit ka marrë shtysë të fuqishme nga teknologjia 4G dhe rritja e përdorimit të telefonave inteligjentë.
Ersuin Shehu/SCAN
Uria e shqiptarëve për megabyte – Trafiku i të dhënave u rrit me 12.8%. Zëvendëson telefonatat dhe mesazhet
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.