Intervista e Trump në Davos – Flet për dollarin, marrëveshjet tregtare dhe qëllimin e vizitës së tij
Presidenti i Shteteve të Bashkuara Donald Trump, tha në një intervistë përpara fjalimit të tij në Forumin Ekonomik Botëror, se kërkon që dollari të jetë i fortë, duke bërë kontradiktë me komentet e sekretarit të Thesarit.
“Dollari do të vazhdojë të fuqizohet dhe përfundimisht, unë dua që dollari të jetë i fortë”, tha Trump, duke shtuar se komentet e Mnuchin janë keqinterpretuar.
Sipas Trump, Shtetet e Bashkuara janë fuqizuar ekonomikisht dhe se askush nuk duhet të flasë në publik për dollarin. Gjatë intervistës, Trump shtoi se Shtetet e Bashkuara do të qëndrojnë në Partneritetin e Trans-Paqësorit, nëse negociatorët amerikanë janë të aftë për të krijuar një marrëveshje më të mirë.
“Do ta pranoja marrëveshjen me 12 vendet, nëse do të kishim kushte më të mira. Por Partneriteti i Trans-Paqësorit ishte një marrëveshje e tmerrshme, ashtu si dhe NAFTA”, tha Donald Trump, duke përsëritur se do të preferonte marrëveshjet dypalëshe, që mund ti përfundojë nëse shfaqen probleme.
Presidenti përmendi deficitin tregtar me Meksikën dhe me Kanadanë dhe shtoi se duhet bërë diçka në lidhje me këtë.
Trump përmendi përsëri qëllimin e vizitës së tij në Davos, duke thënë se kërkon që investitorët të rikthehen në Amerikë dhe të investojnë para në vend.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.