Investime në rrjetin elektrik – Çela: Linjë e re në Laprakë, Gjiknuri: Përballuam thatësirën
Rrjeti i energjisë elektrike në zonën e Laprakës do të zëvendësohet tërësish, ndërsa do të ndërtohen 21 kabina të reja dhe 7 të tjera do të rikonstruktohen. Investimi në këtë zonë është inspektuar nga ministri i Infrastrukturës dhe Energjisë, Damian Gjiknuri dhe administratori i OSHEE, Adrian Çela, i cili tha se falë kësaj ndërhyrjeje do të shtohen 20 km linja të reja.
“Janë 20 kilometra kabëll i ri, janë rreth 28 kabina të reja. Ky investim pasohet edhe nga një tjetër për fidrin 356 që do të kapë gjithë pjesën e mbetur të Don Boskos dhe Bregun e Lumit. Brenda këtij viti, kjo zonë do të ketë një linjë të re shpërndarjeje brenda standardeve. Nuk është investimi i fundit që po kryejmë në Tiranë me fondet e OSHEE. Dua të falënderoj të gjithë abonentët, jo vetëm në qytetin e Tiranës por në mbarë Shqipërinë që vazhdojnë ti përgjigjen pagesës së faturave. Ritmi i arkëtimeve është në nivele të kënaqshme dhe kjo po u kthehet qytetarëve me investime”, theksoi administratori i OSHEE-së Adrian Çela.
Ministri Gjiknuri u ndal se situata e krijuar në sektorin energjetik si pasojë e thatësirës së tejzgjatur, ndërsa shtoi se falë reformës mbështetja buxhetore u reduktua ndjeshëm.
“Është pjesë e një plani për rivitalizimin e të gjithë infrastrukturës energjitike në gjithë Shqipërinë. Kjo po vazhdon pavarësisht situatave të vështira financiare që ka patur Operatori i Shpërndarjes për shkak të krizës energjitike. Suksesi i reformës në energji u provua, me këtë test që kaloi sistemi, përballoi importe deri në 90 milion euro pa shkundur financat e shtetit. Të mos harrojmë se dikur, kur kishte krizë energjitike e thatësirë, financat e shtetit shkundeshin dhe pengohej çdo lloj investimi tjetër. Përkundrazi, OSHEE ka qenë në gjendje ti përballojë këto me të ardhurat e veta, me një mbështetje minimale e të programuar nga Buxheti i Shtetit. Në çdo rast vendi nuk duhet të mbetet pa energji por siç e thashë, treguesi i suksesit të reformës bëri të mundur që kompania të sigurojë furnizimin me energji, të importojë edhe pse në kushte të vështira e me çmime të larta për shkak të thatësirës e mungesës së prodhimit në gjithë Ballkanin. Ka qenë e planifikuar që në fillim të vitit një garanci e mbështetje prej 3 miliard lekësh për sektorin energjitik. Klima po përmirësohet dhe besoj se pjesa më e madhe e rrezikut është tejkaluar. Në kushtet që jemi, edhe me mbështetjen në bazë të aktit normativ, situata do jetë e stabilizuar dhe nuk do kemi problem me importin e furnizimin”, nënvizoi Gjiknuri.
Sipas ministrit, aktualisht situata është e stabilizuar, ndërkohë që në kushtet aktuale nuk është e domosdoshme një ndërhyrje e dytë në buxhetin e shtetit.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.