Investime në Shkozë – Transformohet blloku i banimit, përfitojnë 4500 qytetarë

Rreth 4500 banorë të Shkozës janë përfitues të investimeve në infrastrukturë që janë bërë në bllokun e tyre të banimit. Nga një zonë tërësisht informale, blloku i banimit prej 5.1 ha që kufizohet nga Rr. “Bashkim Kodra”, “Shkretëve”, “Shpëtim Zajmi”, “Spahiu” dhe “Ali Shefqeti”, në zonën e re të Shkozës, është shndërruar në një hapësirë urbane me të gjitha standardet

“Kjo lagje quhet lagja e ‘Shkretëve’ dhe në fakt, fjala e shkretë i shkonte fare mirë sepse ishte një hapësirë me dhe, llucë, baltë, e zhytur terr dhe kaos urban. Sot lagja ka pësuar një transformim të madh. Kaluam nga dheu në asfalt, nga terri në ndriçim LED, nga kaosi në sinjalistikë moderne, nga mungesa e ujit dhe e plehrave mullar, në një situatë ku lagja ka rrjetin më modern të mbledhjes së mbeturinave në qytet. Pra, si dita me natën”.

Kryebashkiaku siguroi se puna në këtë zonë do të vazhdojë për të përfunduar edhe rrugët e tjera, në skajet fundore të njësisë.

“Duam të vazhdojmë deri në kulmet fundore kapilare të zonës. Megjithatë, për 4500 banorë të zonës së Shkozës sot është një ditë e bukur dhe një ditë e mbarë, një ditë që realisht ndihen se kanë ardhur më në fund në Tiranë”.

Ky investim i Bashkisë së Tiranës ka përfshirë ndërtimin e 22 rrugëve të bllokut. Krahas punimeve për trupin e rrugës, është bërë pajisja e zonës me rrjetin e kanalizimeve të ujërave të zeza e të bardha, trotuareve, ndriçimi, si dhe vendosja e sinjalistikës vertikale dhe horizontale etj.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.