Investimet e Bashkisë – Nis ndërtimi i dy rrugëve te “Depoja e Ujit” në Njësinë nr.2
Bashkia e Tiranës nis punën për ndërtimin e dy rrugëve të reja te zona e njohur si “Depoja e Ujit” në Njësinë numër 2.
Gjatë inspektimit të punës në këtë njësi kreu i bashkisë Erion Veliaj u shpreh se rrugët të reja do të jenë me standarde, të cilat përfshijnë kanalizime, shtrim rrjeti të telefonisë dhe ndriçim.
Sipas kreut të bashkisë, ky transformim vjen nga nevoja e qytetarëve për ta bërë Tiranën njëlloj të jetueshme si në qendër edhe në periferi.
Veliaj shtoi se Bashkia e Tiranës ka parë me prioritet investimet që sjellin urbanizim në ato zona ku më parë është bërë procesi i legalizimeve, ashtu si edhe në këtë zonë të zhvilluar gjatë viteve të tranzicionit.
Veliaj kërkoi mirëkuptimin e banorëve për problemet që mund të shkaktohet për shkak të punimeve të cilat parashikohen të përfundojnë pas 6 muajsh.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.