Investimet e Fondit Amerikan, Granoff: Pas Pazarit të Ri në Tiranë, financojmë të tjera projekte
Dhjetëra artizanë nga qyteti historik i Krujës u mblodhën pranë Pazarit të Ri në Tiranë për të ekspozuar produktet e tyre në këtë hapësirë të veçantë të kryeqytetit. I pranishëm në aktivitet ishte kryebashkiaku, Erion Veliaj dhe drejtori i Bordit Drejtues të Fondit Shqiptaro-Amerikan për Zhvillim, Michael Granoff, i cili vlerësoi projektin e Pazarit të Ri, duke shtuar se është fillimi i shumë projekteve të tjera që do të realizohen me qeverisjen vendore dhe me qeverinë e Shqipërisë.
“Jam me të vërtetë i kënaqur që jam këtu sot me kryetarin e bashkisë dhe zonjën Gjermeni, për të festuar këto gurë të vjetër që sot janë kthyer në një projekt jashtëzakonisht shumë fantastik dhe fatmirësisht projekti ka dalë edhe më bukur se ç’mendonim para disa muajsh. Ndërkohë, ky projekt është përfunduar dhe në njëfarë mënyre mund të shohim se çfarë do të vazhdojë të bëhet në të ardhmen, është gjithashtu edhe fillimi i shumë projekteve të tjera që mund të bëjmë dhe mund të realizojmë me qeverisjen vendore dhe me qeverinë e Shqipërisë”.
Duke falenderuar Fondin Shqiptaro-Amerikan për Zhvillim për kontributin që ka dhënë për realizimin e projektit të Pazarit të Ri, Veliaj bëri të ditur se kanë nisur bisedimet për të realizuar të tjera investime të rëndësishme në kryeqytet.
“Mezi pres që pas suksesit të Pazarit të Ri, të vazhdojmë me disa projekte të tjera. Jemi në bisedim me Fondin se cili do të jetë projekti dhe investimi ynë i ardhshëm në qytetin e Tiranës. Por, sot besoj është koha për mirënjohje nga zemra për të gjithë ata që kanë kaluar ditë dhe netë të tëra në një projekt me kaq shumë detaje, por që besoj ka përfunduar në perfeksion”.
Që prej muajit mars, kur Pazari i Ri u përurua zyrtarisht, ai është kthyer në një destinacion turistik, ku vendas e të huaj gjejnë rastin të shijojnë specialitetet e kuzhinës tradicionale shqiptare.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.