Investimet e huaja – 90% të përqendruara në tre sektorë
Mbi 90% e investimeve të huaja në tremujorin e tretë të vitit u përqendruan në tre sektorë të ekonomisë.
Sipas të dhënave nga Banka e Shqipërisë, sektori i energjetikës dominoi fluksin tremujor të investimeve të huaja, kryesisht falë gazsjellësit TAP. Investimet në energjetikë kishin vlerën e 193 milionë eurove ose afro 65% të fluksit tremujor të investimeve.
Dy sektorë e tjerë që sollën flukse domethënëse investimesh ishin aktivitetet financiare dhe industria nxjerrëse, me rreth 40 milionë euro secila. Të marra së bashku, këto degë sollën 274 milionë euro ose 92% të vlerës totale të investimeve të huaja direkte.
Zbërthimi i këtyre investimeve, në vija të përgjithshme, nuk është shumë i vështirë: ata që po investojnë shuma të mëdha në Shqipëri janë TAP, Statkraft, Bankers Petroleum, si edhe grupet e huaja bankare që aplikojnë rritje të kapitalit për bankat e tyre shqiptare.
Investimet e huaja direkte po ruajnë nivele të larta, por, megjithatë është fakt se ato ngelen të përqendruara në pak sektorë, madje në pak ndërmarrje, ndërsa prej vitesh mungojnë projekte të reja me rëndësi.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.