Investimet e huaja – Kalojnë pragun e 1 miliard eurove

Investimet e huaja në Shqipëri vitin e kaluar kaluan pragun e 1 miliard eurove. Sipas të dhënave nga Banka e Shqipërisë, ato iu rikthyen rritjes në tremujorin e fundit, çka bëri që investimet e huaja direkte të rriteshin për të katërtin vit radhazi. Sipërmarrësit e huaj investuan 1 miliard e 22 milionë euro, në rritje me afro 14% krahasuar me vitin 2017.

Edhe vitin e kaluar investimet e huaja u dominuan nga projektet madhore të investimit në energjetikë. Ky sektor solli rreth 46% të investimeve të huaja direkte gjatë vitit të kaluar ose 468 milionë euro. Këto investime i takojnë kryesisht dy ndërmarrjeve, TAP dhe Devoll Hydropower. Megjithatë, pesha e energjetikës ndaj totalit të investimeve të huaja është në rënie graduale, për shkak se dy projektet e mësipërme e kanë arritur pikun e ciklit të investimit dhe janë drejt mbylljes së plotë.

Sektorët e tjerë sidoqoftë nuk kanë një peshë të krahasueshme me energjetikën në strukturën e investimeve të huaja. Investimet e huaja në industrinë nxjerrëse ranë sërish vitin e kaluar në 171 milionë euro dhe përbëjnë rreth 17% të investimeve të huaja direkte. Për t’u përmendur gjatë vitit të kaluar ishte rritje e investimeve të huaja në pasuri të paluajtshme. Sipas Bankës së Shqipërisë, vlera e këtyre investimeve arriti në 115 milionë euro, afro tre herë më shumë krahasuar me vitin 2017.

Sektori financiar dhe në veçanti ai bankar ngelen gjithashtu ndër degët me peshë domethënëse kundrejt totalit të investimeve të huaja. Vitin e kaluar, investimet e huaja në këtë sektor arritën vlerën e 104 milionë euro.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.