Investimet e huaja – Qeveria do kontraktojë konsulent për promovimin
Investimet e huaja kanë qenë ndër vite një nga motorët e rritjes ekonomike por më evidente dhe me theks të veçantë kjo ka qenë së fundmi.
Banka Botërore, ajo e Shqipërisë por edhe institucione të tjera kanë lakuar në raportet e tyre se projekte si TAP apo hidrocentrali i Devollit i kanë dhënë një nxitje të madhe ekonomisë e reflektuar në punësim por edhe tek shifra finale e Prodhimit të Brendshëm Bruto.
Në këto kushte kërkesë e vazhdueshme është ajo e nxitjes së investimeve të tjera të huaja që do të ruajnë trendin rritës në ekonomi.
E këtë sugjerim duket se qeveria e ka marrë seriozisht pasi së fundmi Ministria e Zhvillimit Ekonomik është duke kërkuar një konsulent ku në objekt të kontratës është asistenca për fuqizimin e Shqipërisë si vend kyç për thithjen e investimeve të huaja.
Në dispozicion për këtë kontratë është vënë një fond limit prej 70 milionë lekësh dhe afati për ekzekutimin e kontratës do të jetë 6 muaj. Me ritmet aktuale llogaritet që kjo kontratë të mbyllet në fund të këtij viti.
E ndërsa ka pasur një pjesëmarrje të institucioneve shqiptare nëpër panaire dhe forume ndërkombëtare në kërkim të tregjeve të reja të investitorëve potencialë duket se tashmë po kërkohet edhe një partner tjetër që do të asistojë në strategjinë e promovimit.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.