Investimet, krahasimi me Europën – Shqipëria, normën e 5-të më të lartë në raport me PBB
Në Europë, vetëm Turqia, Kosova, Çekia dhe Irlanda kanë një normë më të lartë të investimeve në raport me Prodhimin e Brendshëm Bruto sesa Shqipëria.
Të dhënat më të fundit të Eurostat, tregojnë se, Shqipëria është e 5-ta në Europë në këtë renditje, me një normë që fiksohet në 24.5% të Prodhimit të Brendshëm Bruto. Indikatori në fjalë i referohet formimit të kapitalit bruto dhe merr parasysh investimet si publike, ashtu edhe ato private.
Të dhënat i referohen vitit 2016 për Shqipërinë, ndërkohë që për 2017 nuk ka të dhëna të përditësuara.
Gjithsesi, të dhënat paraprake të Fondit Monetar Ndërkombëtar flasin për një normë në 24.8%, ndërkohë që këtë vit projektohet në 24.5%.
Mesatarja e vendeve të Bashkimit Europian, por edhe atyre të 19 vendeve që ndajnë monedhën e përbashkët fiksohet në rreth 20%. Në vitin 2007 ndërkohë në Shqipëri, kjo normë ka qenë në rreth 36.4%, e dyta më e lartë në kontinent.
Nga viti 2000 deri në vitin 2008, ky indikator në vendin tonë ka qenë sipër nivelit të 30%, gjë që është një veçori e vendeve në zhvillim.
Në Europë ndërkohë, në vend të parë të këtij klasifikimi renditet Çekia, me një normë në 25% për 2016 dhe 25.2% për 2017-ën. Në vend të fundit ndërkohë renditet Britania e Madhe me 16.9% vlerën e investimeve në raport me Prodhimin Kombëtar.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.