Investimet, më të ultat në 10 vjet/ Për dy muaj u shpenzuan vetëm 15.6 milionë euro
Buxheti i shtetit ka shpenzuar për investime publike në dy mujorin e parë të vitit afro 2 miliardë lekë apo vetëm 15.6 milionë euro. Të dhënat zyrtare të financave, tregojnë një ecuri shumë të dobët të punëve publike, pasi shifra e dymujorit është me ulëta në 10 vite.
Në raport me Shkurtin 2019, janë shpenzuar 3.8 miliardë lekë më pak, ndërsa hendeku me Shkurtin 2018 është edhe më i lartë, pasi rezulton të jenë disbursuar 6.5 miliardë lekë. Të dhënat tregojnë mosecuri normale të projekteve infrastrukturore, e cila lidhet edhe me pasojat e tërmetit të 26 Nëntorit 2019, ku fokusi i qeverisë dhe i biznesve ka qenë në riparimin e tyre, çka ndoshta ka sjellë një lënie pas dore të punëve publike.
Referuar shifrave, vitet 2011-2013 kanë pasur fluksin më të lartë të parave të disbursuara për punë publike në dymujor. Ndërkohë që pritshmëritë edhe në vazhdim janë pesimiste, pasi masat e marra për frenimin e përhapjes së coronavirusit në muajin Mars dhe Prill dhe faktit që një sërë aktivitetesh janë të ndaluara, do të reflektohet edhe në këtë drejtim.
Ndërsa duhet theksuar se për shkak të pasojave që la tërmetit i 26 Nëntorit dhe Covid-19, u ndërhy me shkurtime në këtë zë, çka pritet që të lërë edhe shenjat e veta në zhvillimin e ekonomisë.
Investimet publike në vite:
Shkurt 2020 2 miliardë lekë
Shkurt 2019 5.8 miliardë lekë
Shkurt 2018 6.5 miliardë lekë
Shkurt 2017 3.1 miliardë lekë
Shkurt 2016 2.4 miliardë lekë
Shkurt 2015 3.6 miliardë lekë
Shkurt 2014 2.6 miliardë lekë
Shkurt 2013 7 miliardë lekë
Shkurt 2012 6.8 miliardë lekë
Shkurt 2011 6.8 miliardë lekë
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.