Investimet në kryeqytet – Veliaj: Vitin që vjen, fokusi te hapësirat çlodhëse
Investimet në vitin e fundit të mandatit të kryetarit të Bashkisë së Tiranës, Erion Veliaj do të fokusohen te hapësirat çlodhëse. Teksa mori pjesë në Festivalin Ndërkombëtar të Balonave në Parkun e Liqenit, kryebashkiaku tha se kjo është pjesë e planit, pas rindërtimit të çerdheve, kopshteve dhe shkollave.
“E di që është shumë e rëndësishme të bëjmë çerdhe, kopshte, shkolla të reja. Në 17 shtator hapim një shkollë ikonë të Tiranës, shkollën “Kosova”, e cila do të ulë mbingarkesën që kanë pasur shkollat e Njësisë 2 dhe qendrës së Tiranës, si “Osman Myderizi”, “Mihal Grameno”, shkolla e Saukut, Liceu, duke krijuar kushte komode, por edhe duke ngritur standardin e asaj çka do jetë një shkollë e re. Ndaj, plani për Tiranën vitin e ardhshëm është, patjetër që 5 ditët që shkojmë në shkollë, kopsht e çerdhe të jenë perfekt, por edhe dy ditët e javës apo gjithë pasditet, të kemi hapësira të reja tek Liqeni”.
Për dy ditë me radhë, në Parkun e Liqenit u organizua Festivali Ndërkombëtar i Balonave, duke rikthyer pas shumë vitesh një traditë të kryeqytetit. Ndërkaq, drejtori i Përgjithshëm i Agjencisë së Parqeve dhe Rekreacionit, Blendi Gonxhe, u shpreh se tashmë ky festival do të jetë një aktivitet i përvitshëm.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.