Investimet në rrjetet celulare – Arritën në 32 milionë euro për vitin 2018
Investimet e operatorëve të telefonisë celulare vitin e kaluar kishin vlerën e 4 miliardë lekëve, ose rreth 32 milionë eurove.
Të dhënat nga Autoriteti i Komunikimeve Elektronike dhe Postare tregojnë se, megjithëse performanca financiare e operatorëve nuk ishte shumë e mirë, investimet u rritën me rreth 50% krahasuar me vitin 2017. Në masën dërrmuese, këto investime u kryen nga Vodafone dhe Telekom Albania, ndërsa Albtelecom në vitet e fundit ka kryer investime modeste në segmentin celular, me rreth 650 mijë euro në vit.
Tregu ka nevoja të mëdha për investime, sidomos në teknologjitë që lidhen me transmetimin e të dhënave, sepse përdorimi i internetit nga rrjetet celulare është në rritje vit pas viti. Sipas AKEP, vitin e kaluar çdo përdorues konsumoi rreth 2.6 GB internet nga rrjetet e komunikimit të lëvizshëm. Krahasuar me vitin 2017, përdorimi mesatar i internetit është rritur me 26%.
Megjithatë, AKEP thekson se rezultatet e dobëta financiare në vitet e fundit ndikojnë në mënyrë të konsiderueshme mundësinë e operatorëve për të rritur investimet dhe për të përmirësuar teknologjitë, në funksion të rritjes së cilësisë së shërbimit për konsumatorët. Vitin e kaluar, vetëm Vodafone arriti rezultat financiar pozitiv për rreth 700 milionë lekë, ndërsa Telekom dhe Albtelecom mbyllën një tjetër bilanc me humbje.
Këtë vit, tenderi për brezin 800 Mhz dështoi të jepte dy nga tre të drejta përdorimi, sepse çmimi dysheme për pjesëmarrjen në tender, prej 7.44 milionë euro, u cilësua tepër i lartë nga operatorët Telekom Albania dhe Albtelecom.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.