Investimet në shëndetësi – Rama: Rritje tjetër rrogash për infermieret, mjekët dhe gjithë personelin
Kryeministri Edi Rama dhe Ministrja e Shëndetësisë dhe Mbrojtjes Sociale, Ogerta Manastirliu, vizituan maternitetin e ri të Sarandës, i rikonstruktuar nga një investim i buxhetit të shtetit, me vlerë 336 milionë lekë. Ministrja Manastirliu tha se, investimi për maternitetin ishte një domosdoshmëri, pasi ndërtesa e vjetër e tij ishte tërësisht e amortizuar dhe nuk ofronte as kushtet më minimale për trajtimin e nënës dhe fëmijës.
“Kemi investuar në spitalin bashkiak të Sarandës, në maternitetin e ri të qytetit. Dikur ka qenë në një zonë në qendër të Sarandës, por komplet i degraduar, sot ne një ndërtim të ri, investim i buxhetit të shtetit i nisur në vitin 2017, në vlerën 336 milionë lekë, bashkë me pajisjet. Ndërkohë jemi duke mobiluar patologjinë dhe kirurgjinë, pra, është një tjetër investim së bashku me maternitetin, kështu që përfundojmë të gjithë korpusin e spitalit të Sarandës.”
Duke e cilësuar maternitetin e ri një model shërbimi, ministrja Manastirliu tha se me buxhetin e vitit 2019 do të investohet edhe në maternitetet e qyteteve të tjera. Ndërsa, kryeministri theksoi se do të rritet mbështetja për stafet mjekësore.
“Në janar kemi daljen e 300 specialistëve të parë, se ishte 4 vjet vakum, pasi nuk u bënë specializime dhe do kemi menjëherë mbushjen e vakumit të krijuar në vite. Do keni rritje tjetër rrogash për infermieret, mjekët dhe gjithë personeli. Besoj që krahasuar me nga u nisem, jemi përpara, krahasuar me ku duam të shkojmë, kemi shumë akoma. Por e dini ju, fëmijët rriten ngadalë, nuk rriten menjëherë.”
Risi për infrastrukturën spitalore është edhe ndërtimi i helikodromit të ri mbi godinën e re të Kirurgjisë dhe Patologjisë, i cili do të shërbejë për transportin e pacientëve me helikopter drejt spitaleve universitare për një shërbim më të specializuar.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.