Investimet në Tamarë e Vermosh – Në vjeshtë, nis puna për zbatimin e projektit
Projekti për rikualifikimin urban të fshatit turistik të Tamarës dhe rindërtimin e rrugës së Vermoshit drejt kufirit me Malin e Zi do të nisë zbatimin në vjeshtë të këtij viti.
Sipas Fondit Shqiptar të Zhvillimit, i cili është edhe zbatuesi i këtij investimi, në fshatin Tamarë është planifikuar të bëhet rehabilitimi i ndërtesave ekzistuese pranë qendrës së fshatit duke ruajtur karakteristikat arkitekturore. Po ashtu, sa i takon rikonstruksionit të çative, edhe ai do të bëhet sipas stilit tradicional.
Ndërkohë, lidhur me rindërtimin e rrugës lidhëse të Vermoshit me Malin e zi, bëhet fjalë për një segment rrugor prej 750 metra. Punimet parashikojnë ndërtimin e mbrojtjes lumore nëpërmjet gabioneve si dhe rindërtimin e gjithë segmenti nga Vermoshi deri në kufi.
Ky projekt synon të nxisë lëvizjen në itinerarin Shkodër-Tamarë-Vermosh drejt Malit të Zi si dhe anasjelltas. Investimi është pjesë e programit “Punët në Komunitet IV: “Zhvillimi i Alpeve dhe Zonave Bregdetare” që bashkëfinancohet nga qeveria shqiptare dhe Banka e Këshillit të Europës (CEB).
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.