Investimet në ujësjellës – Hapet tenderi për 5 bashki, furnizim me ujë 24 orë
Së shpejti rreth 17 mijë banorë në 26 fshatra të bashkive Dibër, Mat, Klos, Tropojë dhe Lezhë do të përfitojnë nga ndërtimi i rrjeteve të rinj të ujësjellësve.
Fondi Shqiptar i Zhvillimit ka shpallur procedurën e prokurimit publik për kompanitë e interesuara, i cili do i hapë rrugë zbatimit në terren të punimeve vjeshtën e këtij viti.
Sipas njoftimit, dorëzimi i ofertave mund të kryhet deri në datën 24 shtator, ndërkohë që nga momenti i lidhjes së kontratës me kompaninë fituese punimet do të zgjatin 12 muaj.
Investimi është pjesë e Projektit “Furnizimi me Ujë i Zonave Rurale III”, i cili parashikon ndërhyrje në shkallë të gjerë në zonat rurale në të gjithë vendin duke siguruar furnizim me ujë të pijshëm 24 orë/ditë pa ndërprerje me standardet më të mira.
Projekti parashikon ndërtimin e linjave të reja të furnizimit, rrjetit shpërndarës ndërtimin dhe rikonstruksionin e rezervuarëve dhe komponentë të tjerë të infrastrukturës.
Të gjithë konsumatorët do të pajisen me matësa dhe do të paguajnë tarifa të pranueshme sociale. Investimi do të sigurojë qëndrueshmëri dhe cilësi të lartë të furnizimit me ujë, duke plotësuar nevojat e banorëve gjatë gjithë vitit për një kërkesë për ujë prej 120 lit/banorë.
Furnizimi me Ujë i Zonave Rurale është një Program i bashkëfinancuar nga Qeveria Shqiptare, Banka Gjermane për Zhvillim, KfW, Bashkimi Europian dhe zbatohet nga Fondi Shqiptar i Zhvillimit.
Njësitë administrative ku do ndërtohen ujësjellësit e rinj:
Njësia Administrative Qendër Tomin Bashkia Dibër
Njësia Administrative Komsi Bashkia Mat
Njësia Administrative Llugaj dhe Tropojë Bashkia Tropojë
Njësia Administrative Kallmet Bashkia Lezhë
Njësia Administrative Gurrë, Suç Bashkia Klos.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.