Investimet në ujësjellësa – Gjiknuri: Pas Gjirokastrës, fuqizim rrjeti edhe në Tepelenë e Përmet
Ministri i Infrastrukturës dhe Energjisë, Damian Gjiknuri, inspektoi nga afër investimet e kryera në ujësjellës dhe rrjetin elektrik gjatë vizitës në qarkun e Gjirokastrës.
Ai u ndal konkretisht te rezultatet e fazës së parë të investimit për ndërtimin e rikonstruksionit të rrjetet të ujësjellës-kanalizimeve, duke deklaruar se do të nisë shumë shpejt edhe faza e dytë. Në këtë sektor investimet kapin vlerën e 3.3 miliardë lekë. Ndërkohë, ministri shtoi më tej se pas Gjirokastrës, do të bëhet fuqizimi i rrjetit të ujësjellësve edhe në Tepelenë e Përmet.
“Sot që flasim pjesa më e madhe e qytetit ka një furnizim 24 orë me ujë dhe me përfundimin e fazës së dytë të investimit që nis këtë vit, i gjithë qyteti i Gjirokastrës do të ketë furnizim me ujë për 24 orë. Ky nuk është investimi i vetëm në Qarkun e Gjirokastrës. Qeveria do të fillojë shumë shpejt investimin për rrjetin e shpërndarjes së ujësjellësit në qytetin e Tepelenës, në Memaliaj. Po vazhdon investimi shumë i rëndësishëm në Bashkinë e Përmetit, ai në Këlcyrë dhe investime edhe në Dropull”, u shpreh Gjiknuri.
Ndërkohë, lidhur me investimet në rrjetin elektrik, Gjiknuri pa nga afër investimin e kryer mbi fuqizimin e nënstacionit të ri të Gjirokastrës dhe ndërtimin e fiderave me rrjet 20kV. Sipas tij, humbjet në Gjirokastër janë në nivelet më të ulëta historike.
“Nga informacionet e fundit që kam edhe nga administratorët e OSHEE, humbjet në Gjirokastër janë tanimë në nivelet më të ulëta historike, rreth 17%. Kjo ka ardhur kryesisht si rezultatet i mirëmenaxhimit por edhe investimeve të kryera të cilat kanë bërë që të administrohet më mirë energjia e hedhur në rrjet”, theksoi Gjiknuri.
Në vitet e fundit në të gjithë qarkun e Gjirokastrës Operatori i Shpërndarjes së Energjisë Elektrike ka investuar për ndërtim rrjeti 1.1 miliardë.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.