Investimet në zonat rurale – Veliaj: Plan për sistemimin e qendrave të fshatrave

Bashkia e Tiranës ka përfunduar rikonstruksionin e rrugës Shirt – Pezë Helmës me gjithë infrastrukturën e nevojshme, ndërkohë që kryebashkiaku Erion Veliaj teksa përuroi punimet theksoi se institucioni që ai drejton ka nisur një plan për sistemin e qendrave të fshatrave, duke i transformuar tërësisht këto zona.

“E gjithë zona e Shirt – Pezë Helmësit tani ka një unazë që depërton fshatrat dhe lagjet kryesore të zonës, për t’i lidhur me rrugën kryesore. Në këto kohë ku kemi një debat shumë të rëndësishëm për fshatin, Bashkia e Tiranës tashmë e ka marrë vendimin. Në gjysmën e dytë të mandatit jemi fokusuar tek fshati. Ishim për të hapur një thertore në Vaqarr, sot një rrugë në Pezë, po vazhdojmë me lagjet në Ndroq dhe besoj se përtej recitimit “Bagëti e bujqësi” është realisht e rëndësishme të bëjmë gjëra konkrete. Plani është që të vazhdojmë siç kemi filluar këtë vit me buqeta investimesh, pra në grupe rrugësh dhe me qendrat e fshatrave. Eksperimentet që kemi bërë deri tani na kanë rezultuar të suksesshme,”- tha Veliaj.

Sipas Veliajt, investime të tilla synojnë që të rikthejnë jetën në fshat edhe në ato zona të cilat ndodhen larg qendrës së qytetit, duke afruar edhe më shumë tregjet dhe shërbimet.

“Kjo rrugë është një gjë konkrete, tregjet janë gjëra konkrete dhe besoj është mënyra më e mirë se si dikujt nuk i predikojmë se pse duhet të qëndrojë në fshat dhe pse duhet të furnizojë qytetin me ushqime, me blegtori, por i japim edhe një inventivë, duke bërë rrugët, si kryesoret, si këto lidhëset që e bëjnë më të afërt tregun, e bëjnë më të afërt shkollën, spitalin. Do të thotë që me një kosto më të ulët dhe cilësi më të lartë, jeta në fshat është e mundur, të paktën aty ku po punojmë në Tiranë,”– shtoi më tej kryebashkiaku.

Duke vlerësuar ndarjen e re administrative, kryebashkiaku u shpreh se këto investime do të ishin të pamundura me të ardhurat që kanë pasur vetë ish-komunat.

Ola Mitre/ SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.