Investimet publike në “hije” – Shtrëngohet “dora” para zgjedhjeve, 22 miliardë në 5 muaj

Ndërsa pritej që qeveria të lëshonte dorën me investime publike, duke i paraprirë zgjedhjeve vendore, shifrat tregojnë ndryshe. Në 5 muajt e parë të vitit, investimet publike janë realizuar në masën 24 për qind, me një mos realizim të planit të periudhës në masën 7 miliardë lekë. Kështu, sipas të dhënave zyrtare të Ministrisë së Financave, për periudhën Janar-Maj, janë shpenzuar rreth 22 miliardë lekë,  ndërsa për të gjithë vitin është akorduar një buxhet për shpenzimet kapitale në masën 80.6 miliardë lekë.

Ajo që vihet re është se edhe në krahasim me vitin 2018 masa e realizimit është më e ulët, pasi në 5-mujorin e një viti më pare ka qenë në nivelin 31 për qind dhe kanë shkuar për investime rreth 27 miliardë lekë. Duke bërë që ky vit të jetë në disavantash me 5 miliardë lekë më pak se 2018-ta.
Në një sqarim zyrtar, Ministria e Financave bën me dije se kjo ka ndodhur për shkak të zgjatjes në kohë të procedurave të prokurimit për punët publike, ndërsa garanton realizim të plotë deri në fund të vitit. Megjithatë duket se sezoni veror dhe zgjedhjet vendore, mund të ndikojnë edhe në muajt në vijim.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.