Investimet strategjike në turizëm – Klosi: Ndërtimi i këtij hoteli të ri, themel i rëndësishëm për sektorin

Një tjetër hotel me 5 yje pritet të  shtohet në vendin tonë.  Bëhet fjalë për  MK hotel një nga brandet prestigjioze të hotelerisë gjermane i cili do të  ndërtohet  pranë aeroportit të Rinasit. Gjatë nisjes së punimeve  ishte i pranishëm edhe Ministri  i Turizmit dhe Mjedisit, Blendi Klosi i cili shprehu bindjen se prezenca e hotelerisë gjermane garanton cilësi, standarde dhe shërbime të certifikuara.

“Ajo që do të ndodhë sot në Shqipëri është garanci për cilësi, korrektesë, siguri, profesionalizëm, certifikim të vlerave të shërbimit në të. Ndaj si ministri i Turizmit dhe Mjedisit kam kënaqësinë t’ju them që: Po, ia dolëm së bashku të kurorëzojmë një punë disamujore për të pasur sot një grup të fuqishëm të biznesit gjerman, Lindner Construction, në një vendimmarrje të tij të fundit për të filluar një investim 100% gjerman, një investim që do të sigurojë edhe këtu në Shqipëri një shërbim cilësor ashtu siç ka siguruar në Berlin, Londër, Frankfurt, Mynih, Shtutgart, Kroaci”,

Klosi theksoi se ky investim me 5 yje, do jetë  një oaz i vërtetë për ata që do të udhëtojnë nga Rinasi, por edhe për ata që duan të shijojnë bukuritë e kësaj zone.

 “Ne duam shumë që sfida jonë 10 milionë turistë, të arrihet duke ofruar cilësi dhe standarde. Ajo që ne po nxisim gjithmonë e më shumë janë investimet e vërteta, investime të investitorëve të huaj por edhe të biznesmenëve shqiptarë në kombinim, t’i afrohen kësaj politike të re për të pasur mundësinë që fuqia e standardit të 5 yjeve të tërheqë të gjithë vagonin e turizmit shqiptar. Ndihem shumë mirë që së bashku ia dolëm të kemi 5 ceremoni sinjifikative, në harkun kohor të 5 muajve.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.