Investimet tek pediatria e QSUT – Agjencia Japoneze për Bashkëpunim investon 570 mijë dollarë në aparatura
Dy pajisje të reja diagnostikuese dhe një sërë aparaturash të tjera mjekësore i shtohen Pediatrisë së Qendrës Spitalore Universitare “Nënë Tereza”.
“Aparaturat e reja që janë instaluar në këtë ambient, rrisin ndjeshëm cilësinë e diagnostikimit për të trajtuar më mirë sëmundjet e fëmijëve, duke përmirësuar cilësinë e shërbimeve në Pediatri”, u shpreh Ministrja e Shëndetësisë dhe Mbrojtjes Sociale, Ogerta Manastirliu gjatë ceremonisë së inaugurimit, ku merrte pjesë edhe ambasadori i Japonisë në Shqipëri.
Aparatura moderne e Rontgenit, me vlerë rreth 200 mijë USD, jo vetëm përmirëson diagnostikimin e sëmundjeve, por funksionon me doza shumë të vogla rrezatimi, çka rrit ndjeshëm sigurinë për fëmijët që kryejnë këto ekzaminime. Në këtë kabinet kryhen rreth 7 mijë ekzaminime në vit.
Investim tjetër shumë i rëndësishëm është pajisja eko Doppler, e cila zëvendëson aparaturën e vjetër të pediatrisë. Kjo aparaturë do të kryejë rreth 8 mijë ekzaminime në vit.
Vetëm gjatë këtij viti, falë partneritetit me Agjencinë Japoneze të Bashkëpunimit, janë investuar 570 mijë USD në pajisje të reja mjekësore në Pediatrinë e QSUT-së.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.