Investimi në kulturë, Rama: Përfitues për shoqërinë, nxit zhvillimin e vendit

Kryeministri Rama, i pranishëm në takimin me temë “Ndërveprimi kulturor në rajon, si nxitës i zhvillimi të qëndrueshëm” u shpreh se duhet të gjejmë rrugët për bashkëpunim në rajon. “Me rëndësi është që të vazhdojmë të gjejmë rrugë për të thelluar dialogun dhe bashkëpunimin në rajon, pasi na bashkojnë më së shumti sfidat e përbashkëta”, tha Rama.

Në nisje të fjalës së tij, Kryeministri ka përmendur buxhetin e kulturës. “Ne hymë në një program disiplinor financiar me FMN dhe rritëm buxhetin për kulturën. Të investosh në kulturë është relative, pasi nuk është gjithmonë mjaft. Duhet të kuptojmë se ky lloj investimi është përfitues për shoqërinë dhe zhvillimin e vendit”

Po kështu gjatë fjalës së tij, Rama pohoi se duhet të kemi një qasje strategjike ndaj të bukurës si mundësi e zhvillimit ekonomik:

“Të gjejmë rrugët për të influencuar sa më shumë qeverisjen në funksion të së bukurës. Programi i Rilindjes Urbane është një program që synon të ringjallë një raport të së bukurës në hapësirën publike. Kam ndeshur një kritikë që ne jemi pa bukë dhe ju investoni për fasada, ne jemi pa ujë e ju merreni me hapësira publike. Aty ku kemi shtrirë këtë program duket diferenca. Jemi të vendosur për të çuar më tej ripërtëritjen e hapësirës urbane”, theksoi kryeministri Rama gjatë fjalës së tij.

Osman Dedja/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.