Investitorët, besim te Eurozona – Morali prek nivelin më të lartë në një dekadë
Ndjeshmëria e investitorëve në Eurozonë gjatë Majit ka prekur nivelin më të lartë në thuajse 1 dekadë, duke tejkaluar edhe pritshmëritë.
Kjo e dhënë vjen në një kohë që pasiguritë politike në Europë po zbehen, dhe reflekton situatën aktuale ekonomike të rajonit.
Indeksi i ndjeshmërisë së investitorëve u ngjit gjatë Majit në 27.4 pikë, që është edhe niveli më i lartë që prej Korrikut të vitit 2007. Në muajin Prill fiksohej në 23.9 pikë.
Projeksionet ndërkohë flisnin për një lexim në vetëm 25 pikë.
“Investitorët dukshëm presin një rënie të pasigurive politike në Eurozonë”, thuhet në raportin e Sentix.
Edhe nën-indikatori i situatës aktuale ekonomike në rajon u ngjit në 34.5 pikë gjatë Majit, nga 28.8 pikë që ishte muajin paraardhës, duke prekur nivelin më të lartë që prej Janarit të vitit 2008.
Indeksi i pritshmërive të Eurozonës u rrit në 20.5 pikë, nga 19.3 pikë që ishte gjatë Prillit, duke prekur nivelin më të lartë që prej Gushtit të vitit 2015.
Ndërkohë që, nën-indikatori i Gjermanisë u rrit po ashtu ndjeshëm, ai i Shteteve të Bashkuara të Amerikës u regjistrua në rënie, pasojë e politikave të Donald Trump.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.