Irani rrit tensionet me rritjen e pasurimit të uraniumit

Irani tha të dielën se së shpejti do të rritë pasurimin e saj të uraniumit mbi tavanin e  vendosur nga marrëveshja e rëndësishme bërthamore e vitit 2015, duke shkaktuar një paralajmërim nga presidenti amerikan Donald Trump ‘të jetë i kujdesshëm’, i cili ka bërë presion ndaj Teheranit për të rinegociuar paktin. Në shenjë të rritjes së tensioneve, Franca, Gjermania dhe Britania, të gjitha anëtare në marrëveshje, shprehën shqetësime lidhur me hapin e marrë nga Teherani, përpjekjen e saj të fundit për të detyruar Perëndimin të heqë sanksionet që shkatërrojnë ekonominë e saj të çalë.

Në një konferencë shtypi, zyrtarë të lartë iranianë kërcënuan për shkelje të mëtejshme, duke thënë se Teherani do të vazhdonte të ulte angazhimet e veta çdo 60 ditë, vetëm nëse palët europiane të marrëveshjes e mbrojnë atë nga sanksionet e imponuara nga Trump. “Ne jemi plotësisht të përgatitur për të pasuruar uraniumin në çdo nivel dhe me çdo sasi“, tha Behrouz Kamalvandi, zëdhënës i Organizatës së Energjisë Atomike të Iranit. “Në pak orë procesi teknik do të përfundojë dhe pasurimi përtej 3.67% do të fillojë“, shtoi ai, duke iu referuar kufirit të vendosur në marrëveshjen 2015.

Duke folur për gazetarët kur ai u largua nga Morristown, New Jersey, Trump paralajmëroi Teheranin. “Irani duhet të jetë i kujdesshëm. Nëse pasurohesh për një arsye dhe nuk do të të them se përse është arsyeja, por nuk është e mirë. Ata duhet të jenë më të kujdesshëm, “tha ai. Irani po ‘bën shumë gjëra të këqija’, tha Trump por nuk e vazhdoi mendimin e tij. “Mënyra se si ata e duan, do të kishin të drejta automatike për të pasur armë bërthamore. Irani kurrë nuk do të ketë armë bërthamore, “shtoi ai.

Kryeministri izraelit Benjamin Netanjahu tha se hapi ishte jashtëzakonisht i rrezikshëm dhe ishte projektuar për të krijuar bomba atomike dhe përsëri i bëri thirrje Europës të vendosë sanksione ndëshkuese ndaj Teheranit. Irani ka mohuar ndonjë qëllim për të zhvilluar armë bërthamore. Sipas marrëveshjes, shumica e sanksioneve ndërkombëtare kundër Teheranit u vendosën në raport me kufizimet në punën e saj bërthamore.

Kërkesa kryesore e Iranit, në bisedimet me partitë europiane për marrëveshjen dhe si parakusht për çdo bisedim me Shtetet e Bashkuara, është që të lejohet të shesë naftën e saj në nivelet përpara se Uashingtoni të tërhiqej nga marrëveshja dhe të rivendoste sanksione. Europianët, të cilët kundërshtojnë tërheqjen e Trump nga marrëveshja, deri tani nuk kanë arritur të shpëtojnë paktin duke mbrojtur ekonominë e Iranit nga sanksionet e SHBA, të cilat kushtojnë miliarda dollarë në shitjet e humbura të naftës. (Reuters)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.