“Irma” lë pas shkatërrim – Në Florida vazhdon “tërbimi”, në Karaibe fillon rimëkëmbja

Uragani Irma është përplasur mbi Floridan me një forcë më të vogël se ç’parashikohej më parë, dhe tashmë klasifikohet si i kategorisë tre.

Më herët gjatë javës së kaluar, uragani goditi pjesëë dërrmuese të ishujve të Karaibeve dhe Kubën me një forcë të kategorisë pesë.

Pavarësisht dobësimit, në Florida dëmet deri më tani rezultojnë mjaft të mëdha. Erërat e forta dhe ujrat e rrëmbyeshëm kanë gjeneruar kaos.

Në Florida ujrat e detit janë bashkuar me ato të shiut duke shkaktuar rrëmbime masive të ujrave.

Ndërkohë që në territorin amerikan, vala e uraganit nuk ka kaluar ende, dhe parashikohet të vazhdojë edhe për të paktën 48 orë, në Havana shkatërrimi që ka lënë pas është i përmasave apokaliptike.

Kryeqyteti i Kubës ka filluar që tani procesin e rimëkëmbjes, që duket se do të jetë shumë i vështirë.

Në territoret franceze të karaibeve ndërkohë, ushtria franceze ka hyrë në aksion. Presidenti Emmanuel Macron deklaroi se, këtë javë do të vizitojë territoret e prekura nga uraganët e njëpasnjëshëm.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.