Ish-pronarët, Vlahutin: Kompensimi 100% i pamundur. Gjoba për ata që kanë përfituar nga toka e tjetrit
Ambasadorja e Bashkimit Europian në vendin tonë, Romana Vlahutin, është treguar e drejtpërdrejtë duke folur në takimin e organizuar mbi të drejtën e pronës.
Sipas diplomates së BE, individët e prekur nga kjo çështje nuk mund të trajtohen si ish-pronarë, pasi përkufizimi nënkupton se ata e zotërojnë një pronë derisa ta shesin atë apo të marrin një kompensim.
Vlahutin pranoi se tema është mjaft komplekse në vendin tonë për shkak të cënimit të pronës private gjatë komunizmit, ndjekur nga një tranzicion shumë i gjatë dhe abuzime të shumta gjatë dekadave. Ambasadorja madje shtoi se korrupsioni ka bërë që shumë njerëz të mund të legalizojnë edhe plazhet me rërë e gurë si tokë bujqësore, e madje edhe detin.
Por sipas Vlahutin çdo gjë e ka një zgjidhje, e cila në rastin tonë nis nga reforma në drejtësi, e cila do të mundësojë mbrojtjen e të drejtave të pronës për qytetarët shqiptarë.
“Ky është një proces shumë sfidues, por nëse vendet e tjera kanë gjetur një zgjidhje për këtë problem, edhe Shqipëria mund ta gjejë atë. Kjo është pse EURALIUS është ngarkuar me detyrën për të parë këtë problem kompleks, të mbledhë eksperiencë nga vende të ndryshme europiane dhe të ofrojë një analizë të sfidave dhe mundësive”, tha Vlahutin.
Sipas ambasadores, parimet e zgjidhjes përfshijnë dialogun dhe marrëveshjen mes palëve të interesuara për të arritur në një rezultat të qëndrueshëm.
“Praktikat europiane kanë treguar se kompensimi 100% për pronarët e shpronësuar nga regjimi i mëparshëm nuk është i mundur de ka nevojë për kompromis. Një tranzicion kaq i gjatë dhe i vështirë nuk mund të përfundojë pa një dialog dhe pa zgjidhje, duke mos përfshirë palët e itneresuara, mbi të gjitha pronarët. Gjithashtu, në mënyrë urgjente, praktikat abuzive nga e kaluara duhet të ndalen dhe ndërtimi i jashtëligjshëm, i legalizuar në kurrizin e pronarëve të ligjshëm nuk mund të vazhdojë më të legalizohet në kurriz të gjithë shoqërisë. Tarifa dhe penalitete realistike duhet të vendosen për ata që kanë pëfituar nga toka e dikujt tjetër”, u shpreh ambasadorja e BE.
Në tryezë mori pjesë edhe ministrja e Drejtësisë, Etilda Gjonaj, e cila pranoi se zgjidhja e problemit të pronës mbetet një sfidë për qeverinë, të cilën po përpiqet ta adresojë me reformën e sistemit të integruar të menaxhimit të tokës.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.