Ish-të përndjekurit, 7 mln USD fondi për këstin e 8 të dëmshpërblimit. Sahitaj: Ka nisur ndarja e pagesave, pritet të përfitojnë rreth 1600 të dënuar
Nuk ka vonuar shumë. Pas njoftimit për çeljen e këstit të tetë për ish të përndjekurit që jetojnë, kanë nisur të ndahen edhe pagesat e para.
Drejtori i Përgjithshëm i Thesarit në Ministrinë e Financave, Lavrdim Sahitaj bën të ditur se nga fondi vjetor i adresuar për kategorinë parësore kanë mbetur edhe 700 milionë lekë, ose 7 milionë USD. Arka gjysmë plot ose gjysmë e zbrazur do të vendoset në funksion të pagesave të radhës, raporton Gazeta “Panorama”.
Nga përllogaritjet e bëra paraprakisht, pritet që 1600 të dënuar të marrin këstin e tetë, duke shënuar kështu fundin e një procesi sa të gjatë aq edhe të lodhshëm
“Për kategorinë parësore janë edhe 700 milionë lekë, të cilat do të përdoren për këstin e tetë të dëmshpërblimit. Aktualisht Ministria e Financave ka nisur nga puna për kryerjen e këtyre pagesave. Bazuar në skemën e re që ka nisur të aplikohet pas miratimit të ndryshimeve ligjore, të parat që përfitojnë janë të dënuarat gra dhe ata që janë në moshë mbi 75 vjeç. Ndërkohë nga kalkulimet e bëra parashikohet që të jenë rreth 1600 përfitues” , shprehet Sahitaj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.