ISHTI shton gjobat në Shkurt – Masa administrative edhe për njësitë e OSHEE
Inspektorati Shtetëror Teknik dhe Industrial ka ndëshkuar me masa administrative 9 subjekte për muajin Shkurt, duke faturuar një total prej 5.9 milionë lekë në vlerë gjobash. Gjobat variojnë nga 100 mijë deri në 1.5 milionë lekë dhe janë të përqendruara kryesisht në subjekte që operojnë në rrethe.
Në krahasim me muajin janar, kur u ndëshkuan 5 subjekte, vlera e gjobave është 1.75 milionë lekë më e lartë.
Ajo që bie në sy është ndëshkimi edhe i njësive të Operatorit të Shpërndarjes së Energjisë Elektrike. Njësia Elektrike në Kukës, Nënstacioni në Bajram Curri dhe Agjencia Elektrike në Tropojë janë gjobitur me nga 100 mijë lekë për mos respektim të rregullores me pasojë aksident të rëndë.
Ndërkohë, gjobat më të larta i takojnë tre subjekteve që tregtonin karburant jashtë normave të lejuara.
Ndër shkeljet e tjera të evidentuara nga ISHTI gjatë muajit Shkurt ishin edhe mungesat e dokumentacionit dhe përdorimi i rezervuarit pa targën.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.