Ishulli midis Francës dhe Britanisë i bën “gjëmën” Abramovich-it / Ngrin më shumë se 7 miliard dollarë asete të dyshuara në pronësi të oligarkut rus

Gjykata Mbretërore e shtetit ishull të Jersey ka ngrirë më shumë se 7 miliardë dollarë asete të dyshuara se janë të lidhura me oligarkun rus Roman Abramovich.

Në një deklaratë të lëshuar, Departamenti i Oficerëve të Ligjit tha se ekzekutoi urdhra kontrolli në vende që besohet të kenë lidhje me bizneset e Abramovich.

Urdhri i ngrirjes, i njohur si “saisie judiciaire”, mbulon asetet ose të vendosura në Jersey ose në pronësi të subjekteve të inkorporuara atje.

Pasuria e Abramovich vlerësohet aktualisht në 13.9 miliardë dollarë, sipas Bloomberg, por është e paqartë se si ndikojnë këto asete të ngrira së fundmi.

Pasuria e manjatit të çelikut dhe nikelit ra me rreth 3 miliardë dollarë pas pushtimit rus të Ukrainës dhe në mars ai tha se do të shiste klubin e futbollit Chelsea, të cilin e ka në pronësi që nga viti 2003.

Përveç kësaj, Abramovich besohet të jetë pronar i disa jahteve, dy prej të cilëve duket se po shmangin portet ku mund të kapeshin, ndërsa një tjetër thuhet se u transferua te një bashkëpunëtor biznesi vetëm disa orë pas fillimit të pushtimit.

Mbretëria e Bashkuar dhe BE kanë vendosur sanksione kundër Abramovich, por miliarderi deri më tani i ka shpëtuar shënjestrës nga SHBA, ndoshta me kërkesë të presidentit ukrainas Volodymyr Zelenskyy. Abramovich u pa duke ndjekur bisedimet e paqes në Stamboll në mars.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.