Islanda, mision për rikthimin e pyjeve të shkatërruara nga vikingët!
Islanda dëshiron të rigjallërojë pyjet që shekuj më parë mbulonin 40% të territorit të saj dhe që u shkatërruan nga Vikingët për të krijuar kullota dhe për dru zjarri.
Pemët mbulojnë aktualisht vetëm 2 % të ishullit dhe shërbimi pyjor islandez dëshiron të mbërrijë në 12 % deri në vitin 2100.
Islanda është e famshme për peizazhet pa pemë por vendi nuk ishte kështu në fillim. Kur vikingët e kolonizuan në shekullin e 9 pas Krishtit, ishte mbuluar me pyje rreth 40 % e tij.
Ndër shekuj, pemët u rrëzuan për të krijuar kullotat e për shfrytëzimin e drurëve deri në atë masë sa krijuan imazhin që ka sot vendi. Nga vitet ’50 qeveria islandeze ka nisur projektin e ripyllëzimit, duke rritur sipërfaqen pyjore nga 1 % që ishte atëherë në 2 %.
Problemi është se pema autoktone islandeze nuk po arrin të zërë rrënjë në vend për shkak të temperaturave gjithnjë e në rritje si rrjedhojë e ngrohjes globale.
Shërbimi kombëtar pyjor ka kërkuar varietet jo autoktone që mund të rriten në Islandë, mes tyre edhe pisha.
Farërat e ardhura kryesisht nga Alaska dhe të përzgjedhura me kujdes i kanë dhënë jetë pyjeve. Objektivi është që të mbulohet 12 % e territorit me pyje deri në vitin 2100.
Avantazhet janë të shumta, pyjet evitojnë erozionin e tokës dhe thithin gazin serrë, përveçse janë një pasur për popullin dhe faunën e egër.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.