Islanda shtrenjton turizmin – Taksa për turistët, që kalojnë me 7-fish numrin e popullsisë
Islanda, një nga destinacionet më të shtrenjta për pushime mund të bëhet së shpejti akoma më e shtrenjtë.
Qeveria po konsideron mënyra të rritjes së taksave për sektorin e turizmit, që është i mbingarkuar nga një numër rekord i vizitorëve pavarësisht vendndodhjes së largët.
“Ky sektor dhe të gjithë ne, duhet të jemi të kujdesshëm që të mos bëhemi viktimë e suksesit tonë”, tha ministri i Turizmit.
Rënia e kronës islandeze dhe vendet e përdorura nga seriale televizive popullorë si “Game of Thrones”, kanë ndihmuar që të krijojnë një rritje eksponenciale të turistëve, nga 490 mijë që ishin në 2010-ën në një vlerësim prej 2.3 milionë për këtë vit.
Kjo shifër është tejet e madhe krahasuar me popullsinë e Islandës prej më pak 340 mijë.
Turizmi regjistron të ardhura të mëdha për ekonominë e vendit, duke sjellë një vlerësim prej 45% të totalit valutave të huaja, apo 5.1 miliardë dollarë për këtë vit, tregojnë të dhënat e Islandsbanki, huadhënësi i dytë më i madh në vend.
Megjithatë, ministri i Turizmi tha se mbingarkesa mund të dëmtojë thesaret natyrore dhe eksperiencën e vizitorëve. Ministri shtoi se disa vende nuk kanë kapacitet për të akomoduar 1 milionë vizitorë çdo vit.
Ndër opsionet që Qeveria po konsideron janë; detyrimi i kompanive të transportit rrugor dhe operatorët e udhëtimeve që të blejnë licenca të veçanta apo të rrisin ngarkesat ekzistuese në dhomat e hoteleve.
Zyrtarët e ministrisë thonë se taksat për hotelet kanë gjeneruar 400 milionë krona në të ardhura për vitin 2016 dhe mund të sjellin 1.2 miliard këtë vit.
Qeveria paraardhëse dështoi të kalojë një ligj që do ti kërkonte vizitorëve, islandezë dhe të huaj, të blejnë një “abone natyrore” prej 14 dollarë.
Çdo barrë tatimore do ti shtojë faturat e shtrenjta të turistëve, ndërkohë që një udhëtim me taksi nga aeroporti në qendër kushton 150$, dhomat e hoteleve janë 30% më të shtrenjta se në vendet nordike dhe pijet alkoolike janë dyfish më të shtrenjta se mesatarja në BE, sipas të dhënave të Islandsbanki.
Çdo barrë tatimore do të përdoret për të përmirësuar infrastrukturën, që sipas ministrit, do të sillte një eksperiencë më të mirë për turistët.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.