Itali, alarmon fenomeni i tkurrjes – I njëjti çmim, për më pak produkt. Nisin kontrollet

Në Itali, Antitrust po monitoron fenomenin e “Shrinkflation” – tkurrjes, pra praktikës sipas të cilës sipërmarrjet reduktojnë sasinë e produktit në paketime duke lënë të pandryshuar çmimin. E gjithë kjo në dëm të konsumatorit. Autoriteti garantues i konkurrencës dhe tregut kërkon të verifikojë nëse mund të ketë shkelje të kodit të konsumit, duke iu referuar veçanërisht disiplinës në fushën e praktikave tregtare jo korrekte.

Autoritetet italiane këmbëngulin se janë në dijeni të ekzistencës së këtij fenomeni duke theksuar se çështja nuk ka të bëjë me faktin e reduktimit të produkteve të paketuara, që është një e drejtë e fabrikës ta bëjë dhe është e ligjshme, por mungesa e transparencës ndaj konsumatorit. Në këtë kuadër nëse ka reduktim të produktit, një gjë e tillë duhet të shoqërohet me njoftimin përkatës në paketim.

Por shoqata jo qeveritare që mbron të drejtat e konsumatorit, Asoutenti, nuk është shumë optimiste për hetimet ndaj fenomenit të pakëndshëm të tkurrjes. Sipas shoqatës ky fenomen i shkakton një dëm të dyfishtë konsumatorit: nga njëra anë kemi të bëjmë me një rritje çmimi të produktit në fjalë, pasi konsumatori paguan të njëjtin çmim po merr në shtëpi më pak produkt. Dhe nga ana tjetër detyron familjet që të blejnë më shpesh këtë produkt, pasi duke qenë i reduktuar konsumohet më shpejtë dhe një gjë e tillë ka pasoja të drejtpërdrejta në buxhetin familjar.

Sipas saj është një praktikë që kompromenton fuqinë blerëse të konsumatorëve pasi duke reduktuar sasinë e produkteve të paketuara, shporta e blerjes reduktohet me 30%.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.