Itali, familjarët “pasurohen” – Të ardhurat dhe konsumi pranë nivelit më të lartë që prej 2011

Gjatë tremujorit të parë të këtij viti, të ardhurat e disponueshme për familjet që jetojnë e punojnë në Itali u rritën me 1.5% në krahasim me tremujorin paraardhës, tregojnë të dhënat më të fundit të publikuara nga instituti i statistikave në vend. Nga ana tjetër, edhe konsumi është rritur me 1.3%.

Në terma vjetorë ndërkohë, të ardhurat janë 2.4% më të larta dhe konsumi 2.6% më i lartë. Në të dyja rastet, bëhet fjalë për rritjen më  të madhe që prej vitit 2011.

Të dhënat sinjalizojnë se, Italia po del nga situata e rëndë ekonomike dhe se, shifrat makroekonomike nuk mbeten pozitive vetëm në bilance, por prekin drejtpërdrejtë xhepat e familjarëve.

Sa i përket fuqisë blerëse të familjeve, ajo është rritur me 0.8% gjatë tremujorit të parë të këtij viti në krahasim me atë paraardhës.

Të dhënat e ISTAT në Itali flasin edhe për borxhin e administratës publike, që ka prekur nivelin e 4.3% të Prodhimit të Brendshëm Bruto.

Të gjitha të dhënat e fundit konfirmojnë se, situata e mirë ekonomike që po kalon Eurozona nuk ka lënë mënjanë as Italinë.

Projeksionet për rritjen ekonomike janë rishikuar vazhdimisht në territor pozitiv gjatë vitit. Madje, të dhënat e tremujorit të parë rezultuan dy herë më të larta se vlerësimet paraprake apo edhe projeksionet.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.