Italia bëhet vendi i parë në Evropë që do të prodhojë vaksinën ruse Sputnik V
Vaksina Sputnik V e Rusisë kundër COVID-19 do të prodhohet në Itali nga korriku, tha të martën Dhoma e Tregtisë Italo-Ruse.
Kështu Italia do të bëhet vendi i parë i BE-së që bën vaksinën ruse, e cila është ende nën shqyrtim nga Agjencia Evropiane e Barnave (EMA).
“Vaksina do të prodhohet nga korriku 2021 në fabrikat e ndërmarrjes farmaceutike italo-zvicerane Adienne në Lombardi në Caponago pranë Monza,” i tha agjencisë së lajmeve AFP Stefano Maggi, një këshilltar për shtyp në Dhomë.
“Dhjetë milion doza do të prodhohen midis 1 korrikut dhe 1 janarit 2022,” tha Maggi, duke theksuar se kjo është “marrëveshja e parë në nivelin evropian për prodhimin e vaksinës Sputnik në territorin e BE”.
Sputnik V nuk ka marrë ende miratim nga rregullatori i BE, i cili filloi shqyrtimin javën e kaluar.
Autoritetet ruse thonë se janë të gatshëm të sigurojnë vaksina për 50 milion evropianë duke filluar nga qershori. Disa vende të BE, duke përfshirë Hungarinë dhe Sllovakinë, kanë filluar administrimin e vaksinës ruse pa pritur miratimin e EMA.
D.B – SCAN
Burimi: Euronews
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.