Italia do heqë karantinën për turistët / Di Maio: Nga mesi i Majit do lejohen shtetet evropiane, Britania dhe Izraeli
Italia planifikon të heqë masat e karantinës për udhëtuesit që mbërrijnë nga vendet evropiane, Britania dhe Izraeli, në mes të muajit Maj, në përpjekje për të rimëkëmbur industrinë e turizmit, sipas Ministrit të Jashtëm, Luigi Di Maio. Detyrimi i karantinës mund të hiqet për udhëtuesit nga Shtetet e Bashkuara nga muaji Qershor, sipas Di Maio, që foli pas një takimi me ministrin e Shëndetësisë, Roberto Speranza, ku diskutuan zbutjen e masave me vendet që kanë norma të larta të vaksinimit.
“Ne po përpiqemi të heqim mini-karantinën për njerëzit që vijnë nga shtetet evropiane, Mbretëria e Bashkuar dhe Izraeli, nëse kanë tampon negative, prova të vaksinimit apo shërimit nga sëmundja në 6 muajt e fundit. E njëjta gjë për SHBA”- shkroi Di Maio në Facebook.
Njerëzit që hyjnë në Itali nga vendet e tjera evropiane dhe Izraeli, përballen aktualisht me 5 ditë të karantinës dhe testimeve të detyruara në mbërritje dhe në fund të periudhës së tyre të izolimit. Për turistët nga Shtetet e Bashkuara, periudha e detyruar e karantinës është 10 ditë. Italia ka regjistruar 122,694 vdekje nga Covid-19 që kur nisi pandemia vitin e kaluar, që është shifra e dytë më e lartë në Evropë, pas Britanisë dhe e 7-a më e madhe në botë. Vendi ka raportuar 4.1 milionë raste deri më tani.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.