Italia “fal” Shqipërinë – I ndalon çdokujt që ka qenë në rajon të hyjë në vend, përveç Shqipërisë
Qytetarët të cilët kanë qenë gjatë 14 ditëve të fundit në Kosovë, Serbi dhe Mal të Zi nuk do të mund të hyjnë dot në Itali, as tranzit, deklaroi ministri i shëndetësisë së Italisë. Ky vendim për të bllokuar këdo që ka qenë në këto vende të hyjë në vend, bën që lista e vende të rajonit të shkojë në 5, pasi më parë ishin përfshirë edhe Maqedonia e Veriut si dhe Bosnje Hercegovina. Në total lista përfshin 16 shtete, nga të cilat 5 janë të Ballkanit Perëndimor, dhe pjesa tjetër kryesisht jashtë Europës.
Italia do të presë kështu çdo linjë komunikimi fizik me këto vende. Kështu, Shqipëria është e përjashtuara e vetme nga lista e zezë e Italisë. Vendimi duket të ketë baza teknike. Në përditësimin më të fundit të qendrës europiane të kontrollit dhe parandalimit të sëmundjeve, Shqipëria është vendi i fundit në rajon për numrin e rasteve të reja me covid-19 në 14 ditët e fundit për 100 mijë banorë me vetëm 39 raste. Të gjitha vendet e tjera të rajonit këtë shifër e kanë më të lartë, deri në disafish.
Kosova është e para në Europë, me 124 raste për 100 mijë banorë, e ndjekur nga Mali i Zi, me 123 raste. Pavarësisht se shqiptarët jo rezidentë e kanë gjithsesi të ndaluar të shkojnë në Itali, kjo është e mundur për ata që kanë dokumente qëndrimi në Itali, familjarët e tyre apo studentët. Por, këta të fundit do të penalizohen të hyjnë në Itali në rast se gjatë 14 ditëve të fundit kanë qenë në një prej vendeve të rajonit, jashtë Shqipërisë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.