Italia injoron “presionet” e BE – Di Maio: Nuk do ketë sanksione. Buxheti nuk ndryshon 

Italia bëri të ditur se nuk do t’i bie prehë kërcënimeve të Bashkimit Europian për buxhetin e vitit të ardhshëm, ndërkohë që zv/Kryeministri Luigi Di Maio hodhi poshtë perspektivën e sanksioneve ndaj vendit. Lideri i partisë populiste 5-yjet tha se është i hapur për dialog, por nuk përmendi lehtësime. Qeveria populiste po përgatitet t’i kthejë përgjigje Komisionit Europian brenda afatit të 13 Nëntorit.

“Të gjithë e dinë që kjo qeveri ka një recetë ekonomike ndryshe nga e kaluara,  që do të jetë pozitive për italinë dhe ato që investojnë në Itali.   Mendoj që aktualisht nuk po përgatitet gjobë nga Bashkimi Europian për Italinë.  Ditën e djeshme ministri italian i ekonomisë kundërshtoi projeksionet e Komisionit për deficitin, për shkak se në aspektin ekonometrik, shifrat janë të gabuara. “

Di Maio shtoi se do të mbahen premtimet për të shtuar kredibilitetin në vend, si të ardhurat bazë për të varfrit dhe ulja e moshës së daljes në pension. Pas skepticizmit nga Brukseli ai tha se qeveria ka besim që objektivi prej 2.4% i deficitit do të arrihet vitin e ardhshëm , për shkak të përshpejtimit të ekonomisë dhe reduktimit të shpenzimeve të panevojshme.

Paralelisht, ministri i Financave Giovanni Tria tha në një seancë në parlament se Qeveria nuk do të  ndryshojë objektivat e deficitit dhe se projeksionet e Bashkimit Europian për një deficit prej 2.9% janë të pajustifikuara. Qeveria ka hasur konflikte me komisionin për planet e shpenzimeve dhe ka akuzuar Brukselin për projeksione jo të sakta për ekonominë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.