Italia, me stimuj të rinj ekonomikë! Miraton paketën në buxhetin 2021 për të nxitur ekonominë e goditur nga virusi
Italia ka miratuar një paketë të re të stimujve në buxhetin e vitit 2021, për të nxitur një rimëkëmbje ekonomike nga kriza e koronavirusit, sipas një deklarate të qeverisë, pas takimit të kabinetit në mbrëmje. Masat për vitin 2021 do të arrijnë një total prej mbi 39 miliardë euro, përfshirë rreth 15 miliardë euro grante nga fondi i Bashkimit Europian për rimëkëmbjen, sipas ministrit të ekonomisë, Roberto Gualtieri.
Koalicioni, i drejtuar nga lëvizja 5-yjet dhe partia demokratike, ra dakord për një version paraprak të buxhetit, sipas burimeve të qeverisë. Ndër masat shtesë, qeveria ka caktuar një fond prej 4 miliardë euro për të kompensuar kompanitë më të goditura nga karantina, si dhe zgjati deri në Janar moratoriumin e ripagesave për kreditë e bizneseve të vogla e të mesme.
Buxheti zgjat gjithashtu skemat e heqjes së përkohëshme nga puna të kompanive për punëtorët që nuk duhen më si pasojë e rënies së aktivitetit nga koronavirusi, me një kosto prej 5 miliardë eurosh.
Thuajse 6 miliardë euro do të vijnë në formën e lehtësimeve tatimore, për të mbështetur punësimin në jugun e varfër, sipas Gualtieri. Italia, një ndër vendet më të goditura nga pandemia, ka projektuar një tkurrje ekonomike prej 9% për vitin 2020 dhe një deficit buxhetor në 10.8% të PBB.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.