Italia miraton paketë të re të Covid-19. Mbi 10 mld euro për të mbështetur bizneset e goditura nga vala e dytë

Qeveria italiane ka miratuar një paketë të re prej rreth 10 miliardë euro për të mbështetur biznesin e goditur nga vala e dytë e pandemisë së koronavirusit. Sipas masave të reja, Roma do të ofrojë menjëherë 1.95 miliardë euro në grante tek bizneset e goditura nga koronavirusi si dhe ndihma ushqimore për të varfërit. Qeveria po përgatit gjithashtu 8 miliardë euro shtesë për të përforcuar ndihmat ekzistuese.

Ministria e Shëndetësisë raportoi mbi 37,000 raste të reja me koronavirus në 24 orët e fundit, ndërkohë që vendi po has vështirësi të parandalojë infeksionin. Ekonomia italiane pritet të tkurret me të paktën 9% këtë vit, për shkak të masave që synojnë frenimin e pandemisë. Qeveria po planifikon të shpenzojë 15-20 miliardë euro të tjera në nisje të vitit të ardhshëm, për të ndihmuar ekonominë, ç’ka pritet të rrisë defiçitin në vitin 2021.

Në përpjekje për të frenuar pandeminë, Qeveria ka ndarë vendin në 3 zona, bazuar tek normat e infeksionit. Shumë rajone, përfshirë Piemonte dhe Lombardinë në Veri, ndodhen në karantinë të pjesshme, me baret, restorantet dhe shumicën e dyqaneve të mbyllura.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.