Italia, ndihmë 200 euro për 28 milionë banorë – Draghi: Nuk preket buxheti, paketa financohet nga të ardhurat shtesë nga energjia

Qeveria italiane ka prezantuar një paketë masash që synojnë të ndihmojë qytetarët në këtë periudhë të rritjes së çmimeve. Kryeministri italian, Mario Draghi, njoftoi se sipas dekretit të Këshillit të Ministrave do të ketë një pagesë prej 200 euro për të punësuarit, të vetëpunësuarit dhe për pensionistët që kanë të ardhura vjetore deri në 35 mijë euro. Masat e njoftuara nga qeveria italiane kapin vlerën e 14 miliardë eurove, që i shtohen ndihmave të mëparshme prej 15.5 miliardë euro, pra një total ndihmash për familjet prej rreth 30 miliardë euro, e barabartë me rreth 2% të Prodhimit të Brendshëm Bruto.

Por, me këto masa nuk është ndikuar aspak buxheti i shtetit apo niveli i borxhit. Kryeministri italian, Mario Draghi, sqaroi se paketa është financuar nga të ardhurat shtesë, si pasojë e çmimeve më të larta të produkteve, sidomos të energjisë. “Masat e njoftuara trajtojnë koston e jetesës, përshpejtimi i çmimeve varet në një masë shumë të madhe nga çmimet e energjisë. Dhe kjo do të thotë se është një situatë e përkohshme që duhet përballuar me mjete të jashtëzakonshme”, shtoi Kryeministri. Sipas përllogaritjeve, kjo paketë do të mbështesë rreth 28 milionë italianë.

Gjithashtu, qeveria ka vendosur një taksë të jashtëzakonshme për kompanitë importuese dhe prodhuese të energjisë, që kanë realizuar fitime shtesë si pasojë e çmimeve të larta të energjisë. Gjithçka e shpjegoi ministri italian i Ekonomisë, Daniele Franco. “Taksa për fitimet shtesë të kompanive do të rritet në 25%, por jo vetëm kaq. Gjithashtu, kemi vendosur të shtyjmë deri më 31 dhjetor garancitë për kreditë bankare për SME-të dhe kompanitë e mëdha”, deklaroi Franco. Bonusi i inflacionit ofron mbështetje për grupet më të dobëta të punëtorëve dhe pensionistëve, duke i balancuar atyre shpenzimet për shkak të çmimeve më të larta.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.