Italia teston arsimtarët – Dalin 13 mijë pozitivë. Maska falas për çdo nxënës. Studentët në protestë: Jo mjaftueshëm
Në prag të çeljes së vitit të ri shkollor, autoritetet italiane po testojnë masivisht personelin e sistemit arsimor. Deri më tani është testuar gjysma e tyre, ose më saktë rreth 500 mijë persona. Ka rezultuar se, nga këto 500 mijë individë, 13 mijë janë pozitivë me covid-19, ose më saktë 2.6% e totalit. Këta persona, por edhe të tjerët që do të rezultojnë pozitiv nga gjysma e mbetur do të vetëizolohen si dhe nuk do të mund të vizitojnë ambientet e punës deri sa tampon tjetër të dal negativ. Rajoni i Lombardisë është ai që ka bërë më shumë progres, duke testuar 70% të totalit të punonjësve. Në Sardgena ndërkohë janë kryer vetëm 5% e totalit të testimeve.
Një tjetër masë që po marrin autoritetet italiane, dhe sidomos Komisari i emergjencës, është edhe pajisja e 100% të shkollave me maska kirurgjikale. Të gjithë ata që hyjnë në shkollë, staf apo nxënës a student duhet të përdorin një maskë të ndryshme çdo ditë, e cila garantohet falas nga shteti. Deri më tani janë shpërndarë 44 milionë maska dhe do të shpërndahen edhe 77 milionë të tjera ditën e hënë. Pavarësisht gjithë këtyre masave, studentët kanë dal nëpër protesta, duke akuzuar qeverinë se spo bën asgjë dhe se nuk ndihen të sigurtë.
Ndërkohë, krejt e kundërta duket se po ndodh në Shqipëri, me shkollat që hapen po ditën e hënë. Në vendin tonë masat janë minimale, testimet për stafin arsimor nuk do të mundësohen, ndërkohë që shteti nuk garanton maskat falas, të cilat kanë një kosto jo të papërfillshem për çdo nxënës, duke llogaritur që janë me një përdorim. Në disa raste, rolin e shtetit po e merr përsipër privati.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.