Izraeli, përballë variantit Delta / Qeveria rivendos disa masa. “Njerëzit të mësohen të bashkëjetojnë me virusin”
Katër Javë më parë, Izraeli po festonte rikthimin tek jetesa normale, pas luftës me pandeminë. Izraeli kishte ndaluar së vendosuri maska dhe braktisur rregullat e distancimit social, pas fushatës së shpejtë të vaksinimit, që uli infeksionet dhe vdekjet. Kjo ndodhi përpara shfaqjes së variantit Delta dhe rritjes së rasteve që kanë detyruar kryeministrin Naftali Bennet, të rivendosë disa masa të Covid-19 dhe rimendojë strategjinë. Qeveria kërkon që izraelitët të mësojnë të bashkëjetojnë me virusin, përfshirë disa masa të vogla të kufizimeve dhe shmangen e një karantine të katërt kombëtare, që mund të dëmtojë ekonominë. Ndërkohë që shumica e grupit të rrezikut në Izrael janë vaksinuar, Bennet shpreson që shumë më pak njerëz të sëmuren rëndë gjatë rritjes së infeksioneve. “Po monitorojmë me kujdes atë që po ndodh në Izrael, si dhe në vendet e tjera, për të ofruar mbrojtje maksimale tek shëndeti i qytetarëve”- tha Bennett.
Treguesi kryesor pas vendimeve është numri i rasteve të ashpra me Covid-19 në spital, që ndodhet momentalisht në 45. Zbatimi i masave do të përfshijë monitorimin e infeksioneve, inkurajimin e vaksinimit, testet e shpejta dhe fushata të informacionit mbi mbajtjen e maskave. Strategjia ngjason paksa me planet e qeverisë britanike për të rihapur ekonominë e Anglisë, pavarësisht se Izraeli ndodhet në procesin e rivendosjes së disa masave të vogla, përfshirë veshjet e detyrueshme të maskave në ambiente të brendshme dhe karantinë për të gjithë të mbërriturit. Ministria e Shëndetit në Izrael ka bërë thirrje për më shumë masa për ndalimin e infeksioneve, por shkencëtarë të tjerë janë mbështetës të qeverisë. Karantina e fundit e Izraelit u vendos në Dhjetor, thuajse 1 javë pasi vendi nisi një nga programet më të shpejta të vaksinimit në botë. Rastet ditore qëndrojnë në rreth 450 dhe varianti delta, i identifikuar fillimisht në Indi, zë rreth 90% të tyre. Rreth 60% e popullsisë prej 9.3 milionë e izraelitëve kanë marrë të paktën 1 dozë të vaksinës së Pfizer me BioNtech.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.