Gabimet që duket se mund t’ju penalizojnë në një intervistë pune – Nuk janë ato që mendoni
Duke marrë në konsideratë të gjitha këshillat që keni marrë për intervistat e punës, ju ndoshta ndiheni sikur duhet të ecni mbi lëvozhga veze deri në momentin që intervista do të mbarojë.
Mos u shqetësoni, nëse kërkoni një orar tjetër për intervistën që do të kryeni, kjo nuk do t’ju penalizonte, madje as një vonesë e mundshme nuk do t’ju hiqte nga lista e kandidatëve për atë vend pune.
Edhe pse nuk këshillohet që ju të shkoni vonë në një intervistë pune duhet të kuptoni se intervistuesit tuaj janë tërësisht njerëzor dhe do e kuptonin një vonesë për shkak të trafikut, apo një problemi tjetër që mund t’ju ketë ndodhur.
E rëndësishme është që ju të shpjegoni arsyen se pse erdhi kjo vonesë dhe nuk do të penalizoheshit aspak.
Në fakt ekzistojnë disa gjëra të cilat ju mund të mendoni se do t’ju kushtonin vendin e punës por që në fakt janë thjesht mite dhe asgjë e tillë nuk ndodh.
- Kërkesa për një orar tjetër për intervistën
Përpara se të bëni një intervistë pune ju do të flisni fillimisht në telefon me një menaxher punësimi apo një rekrutues, si pjesë e procesit paraprak të verifikimit. Nëse e merrni këtë telefonatë në një kohë të keqe, atëherë nuk keni pse ta kryeni intervistën menjëherë. Ju keni të drejtën të ricaktoni një orar tjetër që të jetë më i përshtatshëm për ju. Por mos harroni edhe pse keni të drejtë ta bëni këtë ju duhet të përmendni edhe arsyet se pse po kërkoni një orar tjetër, sigurisht pa hyrë në detaje.
- Pyetja se për cilën punë po intervistoheni
Nuk është e pazakontë që kandidatët të aplikojnë për më shumë se një pozicion pune në të njëjtën kompani, kështu që kur t’ju kontaktojnë nuk ka asgjë të gabuar nëse do të pyesnit se për cilin pozicion bëhet fjalë pasi jo vetëm do të qartësoheni por do të dini dhe cilat aftësi tuaja të nxirrni më shumë në pah gjatë intervistës.
- Vajtja me vonesë
Në një botë ideale, të gjithë do të arrinin 10 minuta para intervistës por fatkeqësisht bota ideale është shumë larg trafikut. Kështu që ndonjëherë mund të ndodhë të vonoheni, mos u shqetësoni nuk është fundi i botës. Sigurisht që nuk është mirë të vonoheni por nëse të gjitha të tjerat do të shkonin mirë kjo vonesë nuk do t’ju penalizonte.
- Veshja e ngarkuar
Pavarësisht kodit të veshjes që kompania ka, në ditën e intervistës ju duhet të paraqiteni me një veshje sa më dinjitoze. Por mos mendoni që veshja do t’ju penalizojë. Edhe pse pamja vizuale është e rëndësishme nuk ndikon aq shumë sa të mos ju marrin në punë për këtë shkak. Nëse ju jeni të përshtatshëm për pozicionin padyshim që do ta merrni atë vend pune.
- Mund të harroni pyetjen që ju bënë
Është normale të bëheni nervoz gjatë një interviste pune dhe intervistuesit e marrin parasysh këtë. Nëse harroni pyetjen që iu është bërë thjesht buzëqeshni dhe kërkoni t’ua përsërisin edhe njëherë. Kjo nuk është fatale dhe sigurisht që nuk do t’ju penalizonte aspak.
- Përmendja e diçkaje që keni parë në profilin e intervistuesit në rrjete sociale
Përpara se të shkoni në një intervistë pune sugjerohet që të keni informacion për kompaninë në të cilën keni aplikuar. Ndaj pjesa më e madhe e aplikantëve fillon të kërkojë me qëllim që të mësojnë diçka më shumë rreth kompanisë.
Nëse keni parë diçka në profilin e intervistuesit apo kompanisë në rrjete sociale që lidhet me punën dhe nuk ju ka pëlqyer ose nuk e keni kuptuar, nuk ka asgjë të keqe të pyesni. Edhe pse mund të dukeni si “stalker” kjo ka një efekt të kundërt. Punëdhënësit të cilët e kanë publikuar diçka të tillë do ta quanin si diçka pozitive që ju jeni interesuar në lidhje me kompaninë dhe se këtë intervistë pune e keni marrë me seriozitet.
V.Hydi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.