Janar-qershor, 400 milionë dollarë plus në buxhet – Bien përsëri pritshmëritë negative prej Pandemisë, arkëtimet nga taksat e tatimet 104%

Ashtu si dhe në fillim të këtij viti, të ardhurat buxhetore kanë vijuar të rrëzojnë pritshmëritë negative të lidhura me Pandeminë Covid 19. Për gjashtëmujorin e këtij viti, në arkat e shtetit janë mbledhur thuajse 400 milionë dollarë më shumë se e njëjta periudhë e një viti më parë. Shifrat janë publikuar nga Ministrja e Financave Anila Denaj, sipas së cilës, Treguesit fiskalë të janar – qershor 2021 tregojnë se ekonomia shqiptare po vijon të performojë pozitivisht. Të ardhurat totale për 6-mujorin e vitit 2021 u realizuan në masën 234 miliardë ose 104 % të planit të 6-mujorit. Krahasuar me një vit më parë të adhuruat kanë rritje prej 39 miliard lekë, thuajse 400 milionë dollarë. Rritje të dukshme kanë shënuar të ardhurat doganore, të cilat rezultojnë 24.3% më shumë se 6 mujori 2020. Të larta janë edhe të ardhurat tatimore, të cilat kanë shënuar rritje me 15.2% më shumë se 6 mujori i vitit të kaluar.

Shpenzimet e përgjithshme publike, për muajin e gjashtë të vitit 2021, arritën në rreth 263.1 miliard LEK me një realizim në masën 95.8 përqind të planit të periudhës, ndërsa krahasuar me të njëjtën periudhë të vitit 2020 ky zë ka rezultuar 12.6 përqind më i lartë ose rreth 29.4 miliard LEK më shumë. Shpenzimet korente dhe ato kapitale, për periudhën 6 mujore, kanë shënuar një realizim respektivisht në masën 98.9 përqind dhe 72.6 përqind të planit të periudhës.

Ndërkaq, niveli i deficitit në muajin e gjashtë të vitit 2021 rezultoi në rreth 29.1 miliardë lekë, afërisht 290 milionë dollarë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.