Java e Parasë – Roli i bankave në edukimin dhe përfshirjen financiare

Në Shqipëri organizohet për të dhjetin vit radhazi “Java e parasë”, eveniment që synon të promovojë në publik dhe veçanërisht te më të rinjtë edukimin dhe përfshirjen financiare. Edukimi financiar nis nga një përdorim i përgjegjshëm i parasë dhe nga formimi i shprehive të kursimit. Përmes kursimit, individët mund të hedhin bazat për kryerjen e investimeve të rëndësishme për ekonomitë familjare, siç mund të jenë vendbanimi apo shkollimi.

Gladiola Prifti, zëvendësdrejtore e degës Tirana 3 të Credins Bank, shpjegon për Tv Scan se kursimi është një mjet i rëndësishëm për të ndërtuar një ekonomi familjare më të shëndetshme dhe më të qëndrueshme. Credins banka ofron produkte të ndryshme, nga më të zakonshmet, deri tek ato më specifiket. Depozita “Kaltra” ju mundëson të krijoni një fond kursimi që fëmija mund ta përdorë pasi të jetë në moshë madhore. Ndërkohë, një investim po kaq i rëndësishëm është ai në një pension privat, që jep më shumë siguri ekonomike në moshën e pensionit.

Marrëdhënia me bankën është e rëndësishme për të qenë të përfshirë financiarisht dhe për të përdorur produktet dhe shërbimet që ofron banka në mënyrë sa më racionale dhe me sa më shumë përfitime.

Banka e Shqipërisë prej vitesh ka rritur fokusin te edukimi financiar, si një kusht themelor për stabilitetin financiar afatgjatë të vendit. Java e parasë është çdo vit pjesa kulmore e këtij programi, përmes aktiviteteve intensive, në bashkëpunim shkollat, bankat dhe universitetet. Në hapje të Javës së parasë, guvernatori Gent Sejko tha se kjo festë synon ndërgjegjësimin e brezit të ri për të qenë qytetarë të ardhshëm të përgjegjshëm dhe të aftë për të marrë vendime financiare të mirëmenduara.

Gjatë kësaj jave, Banka e Shqipërisë, në bashkëpunim me Ministrinë e Arsimit dhe Shoqatën e Bankave, do të organizojnë aktivitete të ndryshme, me qëllim rritjen e përfshirjes financiare të fëmijëve dhe të të rinjve, duke u mësuar si të kujdesen për paratë, si të kursejnë, si të mendojnë financiarisht, si të fitojnë të ardhura nëpërmjet sipërmarrjes dhe të vendosin bazat për të ardhmen e tyre, nëpërmjet kulturës financiare. Mes aktiviteteve që do të zhvillohen këtë vit për Javën e Parasë, është Konkursi Europian i Parasë, i cili zhvillohet për herë të parë në vitin 2018, si një konkurs mbarë europian me qëllim përmirësimin e kulturës financiare të fëmijëve të moshës 13 – 15 vjeç.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.